«Футбольная ліга дзяўчат» правяла фінальныя гульні!

«Футбольная ліга дзяўчат» правяла фінальныя гульні!

У нядзелю вокліч #WOOOOW! быў чутны на ўсю сталіцу.

На палех Асацыяцыі «Беларуская федэрацыя футбола» адыбліся вырашальныя двубоі турніра, які ўвесну ўзрушыў усю спартовую грамадскасць краіны. Ліга #WOOOOW!, што аб'яднала звыш за 60 каманд з усей рэспублікі, даведалася імя першага трыўмфатара праекта. Цягам некалькіх месяцаў паненкі, узрост якіх не перавышаў 13 год, змагаліся ў сваіх дывізіенах, сфарміраваных па геаграфічным прынцыпе. Пасля чаго лепшыя з лепшых атрымалі пуцеўку ў вырашальны этап форума.

Ен прайшоў 9 чэрвеня на комплексе штучных палеў АБФФ, ператварыўшы змаганне васьмі лепшых калектываў спаборніцтва ў сапраўднае футбольнае свята, поўнае пазітыўных эмоцый. Пад воклічы падьрымкі патронаў лігі - прадстаўніц нацыянальнай зборнай краіны - у атмасферы сяброўства ды справядлівай гульні шукальнікі трафея размеркавалі месцы ў табелі аб рангах. Так, бронзавыя ўзнагароды заваявала каманда «Прагрэс-Верцялішкі» (Гарадзенская вобласць); срэбраная пазіцыя засталася за калектывам магілеўскай СДзЮШАР-7; вікторыю ж адсвяткавалі дзяўчаты Першамайскага ФСК беларускай сталіцы.

720x380 woooow final 02

Таксама па выніках турніра былі абраныя лепшыя ў сваіх амплуа:

Брамнік - Варвара Батура (Першамайскі ФСК, Мінск)

Абаронца - Ульяна Пуціковіч (БАЦАР, Брэст)

Форвард - Паліна Капліч («Прагрэс-Верцялішкі», Гарадзенская вобласць);

Бамбардзір - Рэната Каліноўская (Першамайскі ФСК, Мінск)

MVP спаборніцтва - Паліна Фурсо (СДзЮШАР-7, Магілеў)

Па заканчэнні спаборніцтваў пераможцы і ўдзельніцы турніра атрымалі ўзнагароды, пачулі шмат добрых словаў ад прадстаўнікоў АБФФ і УЕФА ды паўдзельнічалі ў сэлфі- ды аўтограф-сесіі футбалістак нацыянальнай зборнай. Дзякуючы гэтаму фінальнаму акорду пілотны для Беларусі моладзевы спартыўны праект атрымаў мажорнае атачэнне ды яшчэ мацней падкрэсліў усю прыгажосць жаночага футбола, які ў Беларусі пачынае ззяць ужо ў катэгорыі U-13.

Дзякуй усім за сезон - гэта сапраўды было #WOOOOW!

720x380 woooow final 01